चारों वेदों से संकलित करने पर चित्र शब्द वाले 282 मंत्र उपलब्ध होते हैं, जो कि प्रत्येक वेद के अनुसार नीचे दिया जा रहा है। इन मंत्रों के अर्थ का अनुसंधान करना चाहिए।
ऋग्वेद/1/1/5
अग्निर्होता कविक्रतुः सत्यश्चित्रश्रवस्तमः। देवो देवेभिरा
गमत्॥
ऋग्वेद/1/3/4
इन्द्रा याहि चित्रभानो सुता इमे त्वायवः। अण्वीभिस्तना
पूतासः॥
ऋग्वेद/1/9/5
सं चोदय चित्रमर्वाग्राध इन्द्र वरेण्यम्। असदित्ते विभु
प्रभु॥
ऋग्वेद/1/17/7
इन्द्रावरुण वामहं हुवे चित्राय राधसे। अस्मान्त्सु
जिग्युषस्कृतम्॥
ऋग्वेद/1/22/7
विभक्तारं हवामहे वसोश्चित्रस्य राधसः। सवितारं नृचक्षसम्॥
ऋग्वेद/1/23/13
आ पूषञ्चित्रबर्हिषमाघृणे धरुणं दिवः। आजा नष्टं यथा पशुम्॥
ऋग्वेद/1/23/14
पूषा राजानमाघृणिरपगूळ्हं गुहा हितम्।
अविन्दच्चित्रबर्हिषम्॥
ऋग्वेद/1/27/6
विभक्तासि चित्रभानो सिन्धोरूर्मा उपाक आ। सद्यो दाशुषे
क्षरसि॥
ऋग्वेद/1/30/21
वयं हि ते अमन्मह्यान्तादा पराकात्। अश्वे न चित्रे अरुषि॥
ऋग्वेद/1/34/10
आ नासत्या गच्छतं हूयते हविर्मध्वः पिबतं मधुपेभिरासभिः ।
युवोर्हि पूर्वं सवितोषसो रथमृताय चित्रं घृतवन्तमिष्यति ॥
ऋग्वेद/1/35/4
अभीवृतं कृशनैर्विश्वरूपं हिरण्यशम्यं यजतो बृहन्तम् ।
आस्थाद्रथं सविता चित्रभानुः कृष्णा रजांसि तविषीं दधानः ॥
ऋग्वेद/1/37/3
इहेव शृण्व एषां कशा हस्तेषु यद्वदान् । नि
यामञ्चित्रमृञ्जते ॥
ऋग्वेद/1/38/11
मरुतो वीळुपाणिभिश्चित्रा रोधस्वतीरनु । यातेमखिद्रयामभिः ॥
ऋग्वेद/1/44/1
अग्ने विवस्वदुषसश्चित्रं राधो अमर्त्य । आ दाशुषे जातवेदो
वहा त्वमद्या देवाँ उषर्बुधः ॥
ऋग्वेद/1/45/6
त्वां चित्रश्रवस्तम हवन्ते विक्षु जन्तवः । शोचिष्केशं
पुरुप्रियाग्ने हव्याय वोळ्हवे ॥
ऋग्वेद/1/48/10
विश्वस्य हि प्राणनं जीवनं त्वे वि यदुच्छसि सूनरि । सा नो
रथेन बृहता विभावरि श्रुधि चित्रामघे हवम् ॥
ऋग्वेद/1/48/11
उषो वाजं हि वंस्व यश्चित्रो मानुषे जने । तेना वह सुकृतो
अध्वराँ उप ये त्वा गृणन्ति वह्नयः ॥
ऋग्वेद/1/63/8
त्वं त्यां न इन्द्र देव चित्रामिषमापो न पीपयः परिज्मन्।
यया शूर प्रत्यस्मभ्यं यंसि त्मनमूर्जं न विश्वध क्षरध्यै ॥
ऋग्वेद/1/64/4
चित्रैरञ्जिभिर्वपुषे व्यञ्जते वक्षःसु रुक्माँ अधि येतिरे
शुभे। अंसेष्वेषां नि मिमृक्षुर्ऋष्टयः साकं जज्ञिरे स्वधया दिवो नरः ॥
ऋग्वेद/1/64/7
महिषासो मायिनश्चित्रभानवो गिरयो न स्वतवसो रघुष्यदः।
मृगाइव हस्तिनः खादथा वना यदारुणीषु तविषीरयुग्ध्वम् ॥
ऋग्वेद/1/66/1
रयिर्न चित्रा सूरो न संदृगायुर्न प्राणो नित्यो न सूनुः ॥
ऋग्वेद/1/66/6
चित्रो यदभ्राट्छ्वेतो न विक्षु रथो न रुक्मी त्वेषः समत्सु
॥
ऋग्वेद/1/71/1
उप प्र जिन्वन्नुशतीरुशन्तं पतिं न नित्यं जनयः सनीळाः।
स्वसारः श्यावीमरुषीमजुष्रञ्चित्रमुच्छन्तीमुषसं न गावः ॥
ऋग्वेद/1/85/11
जिह्मं नुनुद्रेऽवतं तया दिशासिञ्चन्नुत्सं गोतमाय तृष्णजे।
आ गच्छन्तीमवसा चित्रभानवः कामं विप्रस्य तर्पयन्त धामभिः ॥
ऋग्वेद/1/88/2
तेऽरुणेभिर्वरमा पिशङ्गैः शुभे कं यान्ति रथतूर्भिरश्वैः।
रुक्मो न चित्रः स्वधितीवान्पव्या रथस्य जङ्घनन्त भूम ॥
ऋग्वेद/1/92/5
प्रत्यर्ची रुशदस्या अदर्शि वि तिष्ठते बाधते कृष्णमभ्वम्।
स्वरुं न पेशो विदथेष्वञ्जञ्चित्रं दिवो दुहिता भानुमश्रेत् ॥
ऋग्वेद/1/92/12
पशून्न चित्रा सुभगा प्रथाना सिन्धुर्न क्षोद उर्विया
व्यश्वैत्। अमिनती दैव्यानि व्रतानि सूर्यस्य चेति रश्मिभिर्दृशाना ॥
ऋग्वेद/1/92/13
उषस्तच्चित्रमा भरास्मभ्यं वाजिनीवति। येन तोकं च तनयं च
धामहे ॥
ऋग्वेद/1/94/5
विशां गोपा अस्य चरन्ति जन्तवो द्विपच्च यदुत
चतुष्पदक्तुभि:। चित्रः प्रकेत उषसो महाँ अस्यग्ने सख्ये मा रिषामा वयं तव ॥
ऋग्वेद/1/108/1
य इन्द्राग्नी चित्रतमो रथो वामभि विश्वानि भुवनानि चष्टे।
तेना यातं सरथं तस्थिवांसाथा सोमस्य पिबतं सुतस्य ॥
ऋग्वेद/1/110/9
वाजेभिर्नो वाजसातावविड्ढ्यृभुमाँ इन्द्र चित्रमा दर्षि
राध:। तन्नो मित्रो वरुणो मामहन्तामदिति: सिन्धु: पृथिवी उत द्यौः ॥
ऋग्वेद/1/113/1
इदं श्रेष्ठं ज्योतिषां ज्योतिरागाच्चित्रः प्रकेतो अजनिष्ट
विभ्वा। यथा प्रसूता सवितुः सवायँ एवा रात्र्युषसे योनिमारैक् ॥
ऋग्वेद/1/113/4
भास्वती नेत्री सूनृतानामचेति चित्रा वि दुरो न आवः।
प्रार्प्या जगद्व्यु नो रायो अख्यदुषा अजीगर्भुवनानि विश्वा ॥
ऋग्वेद/1/113/15
आवहन्ती पोष्या वार्याणि चित्रं केतुं कृणुते चेकिताना।
ईयुषीणामुपमा शश्वतीनां विभातीनां प्रथमोषा व्यश्वैत् ॥
ऋग्वेद/1/113/20
यच्चित्रमप्न उषसो वहन्तीजानाय शशमानाय भद्रम्। तन्नो
मित्रो वरुणो मामहन्तामदिति: सिन्धु: पृथिवी उत द्यौः ॥
ऋग्वेद/1/115/1
चित्रं देवानामुदगादनीकं चक्षुर्मित्रस्य वरुणस्याग्नेः।
आप्रा द्यावापृथिवी अन्तरिक्षं सूर्य आत्मा जगतस्तस्थुषश्च ॥
ऋग्वेद/1/115/3
भद्रा अश्वा हरित: सूर्यस्य चित्रा एतग्वा अनुमाद्यासः।
नमस्यन्तो दिव आ पृष्ठमस्थु: परि द्यावापृथिवी यन्ति सद्यः ॥
ऋग्वेद/1/119/8
अगच्छतं कृपमाणं परावति पितुः स्वस्य त्यजसा निबाधितम्।
स्वर्वतीरित ऊतीर्युवोरह चित्रा अभीके अभवन्नभिष्टयः ॥
ऋग्वेद/1/125/6
दक्षिणावतामिदिमानि चित्रा दक्षिणावतां दिवि सूर्यासः।
दक्षिणावन्तो अमृतं भजन्ते दक्षिणावन्त: प्र तिरन्त आयु: ॥
ऋग्वेद/1/134/4
तुभ्यमुषास: शुचयः परावति भद्रा वस्त्रा तन्वते दंसु
रश्मिषु चित्रा नव्येषु रश्मिषु। तुभ्यं धेनुः सबर्दुघा विश्वा वसूनि दोहते। अजनयो
मरुतो वक्षणाभ्यो दिव आ वक्षणाभ्यः ॥
ऋग्वेद/1/139/6
वृषन्निन्द्र वृषपाणास इन्दव इमे सुता अद्रिषुतास उद्भिदस्तुभ्यं
सुतास उद्भिद:। ते त्वा मदन्तु दावने महे चित्राय राधसे। गीर्भिर्गिर्वाह: स्तवमान
आ गहि सुमृळीको न आ गहि ॥
ऋग्वेद/1/139/8
मो षु वो अस्मदभि तानि पौंस्या सना भूवन्द्युम्नानि मोत
जारिषुरस्मत्पुरोत जारिषुः। यद्वश्चित्रं युगेयुगे नव्यं घोषादमर्त्यम्। अस्मासु
तन्मरुतो यच्च दुष्टरं दिधृता यच्च दुष्टरम् ॥
ऋग्वेद/1/142/4
ईळितो अग्न आ वहेन्द्रं चित्रमिह प्रियम्। इयं हि त्वा
मतिर्ममाच्छा सुजिह्व वच्यते ॥
ऋग्वेद/1/148/1
मथीद्यदीं विष्टो मातरिश्वा होतारं विश्वाप्सुं
विश्वदेव्यम्। नि यं दधुर्मनुष्यासु विक्षु स्व१र्ण चित्रं वपुषे विभावम् ॥
ऋग्वेद/1/165/13
को न्वत्र मरुतो मामहे व: प्र यातन सखीँरच्छा सखायः।
मन्मानि चित्रा अपिवातयन्त एषां भूत नवेदा म ऋतानाम् ॥
ऋग्वेद/1/166/4
आ ये रजांसि तविषीभिरव्यत प्र व एवास: स्वयतासो अध्रजन्।
भयन्ते विश्वा भुवनानि हर्म्या चित्रो वो याम: प्रयतास्वृष्टिषु ॥
ऋग्वेद/1/172/1
चित्रो वोऽस्तु यामश्चित्र ऊती सुदानवः। मरुतो अहिभानवः ॥
ऋग्वेद/1/174/7
रपत्कविरिन्द्रार्कसातौ क्षां दासायोपबर्हणीं कः।
करत्तिस्रो मघवा दानुचित्रा नि दुर्योणे कुयवाचं मृधि श्रेत् ॥
ऋग्वेद/2/4/5
आ यन्मे अभ्वं वनदः पनन्तोशिग्भ्यो नामिमीत वर्णम्। स
चित्रेण चिकिते रंसु भासा जुजुर्वाँ यो मुहुरा युवा भूत्॥
ऋग्वेद/2/8/4
आ यः स्व१र्ण भानुना चित्रो विभात्यर्चिषा। अञ्जानो
अजरैरभि॥
ऋग्वेद/2/10/2
श्रूया अग्निश्चित्रभानुर्हवं मे विश्वाभिर्गीर्भिरमृतो
विचेताः। श्यावा रथं वहतो रोहिता वोतारुषाह चक्रे विभृत्रः॥
ऋग्वेद/2/13/13
अस्मभ्यं तद्वसो दानाय राधः समर्थयस्व बहु ते वसव्यम्।
इन्द्र यच्चित्रं श्रवस्या अनु द्यून्बृहद्वदेम विदथे सुवीराः॥
ऋग्वेद/2/14/12
अस्मभ्यं तद्वसो दानाय राधः समर्थयस्व बहु ते वसव्यम्।
इन्द्र यच्चित्रं श्रवस्या अनु द्यून्बृहद्वदेम विदथे सुवीराः॥
ऋग्वेद/2/17/8
भोजं त्वामिन्द्र वयं हुवेम ददिष्ट्वमिन्द्रापांसि वाजान्।
अविड्ढीन्द्र चित्रया न ऊती कृधि वृषन्निन्द्र वस्यसो नः॥
ऋग्वेद/2/23/15
बृहस्पते अति यदर्यो अर्हाद्द्युमद्विभाति क्रतुमज्जनेषु।
यद्दीदयच्छवस ऋतप्रजात तदस्मासु द्रविणं धेहि चित्रम्॥
ऋग्वेद/2/34/10
चित्रं तद्वो मरुतो याम चेकिते पृश्न्या यदूधरप्यापयो
दुहुः। यद्वा निदे नवमानस्य रुद्रियास्त्रितं जराय जुरतामदाभ्याः॥
ऋग्वेद/3/2/11
स जिन्वते जठरेषु प्रजज्ञिवान्वृषा चित्रेषु नानदन्न सिंहः।
वैश्वानरः पृथृपाजा अमर्त्यो वसु रत्ना दयमानो वि दाशुषे॥
ऋग्वेद/3/2/13
ऋतावानं यज्ञियं विप्रमुक्थ्य१मा यं दधे मातरिश्वा दिवि
क्षयम्। तं चित्रयामं हरिकेशमीमहे सुदीतिमग्निं सुविताय नव्यसे॥
ऋग्वेद/3/2/15
मन्द्रं होतारं शुचिमद्वयाविनं दमूनसमुक्थ्यं
विश्वचर्षणिम्। रथं न चित्रं वपुषाय दर्शतं मनुर्हितं सदमिद्राय ईमहे॥
ऋग्वेद/3/7/9
वृषायन्ते महे अत्याय पूर्वीर्वृष्णे चित्राय रश्मयः
सुयामाः। देव होतर्मन्द्रतरश्चिकित्वान्महो देवान्रोदसी एह वक्षि॥
ऋग्वेद/3/29/6
यदी मन्थन्ति बाहुभिर्वि रोचतेऽश्वो न वाज्यरुषो वनेष्वा।
चित्रो न यामन्नश्विनोरनिवृतः परि वृणक्त्यश्मनस्तृणा दहन्॥
ऋग्वेद/3/30/13
दिदृक्षन्त उषसो यामन्नक्तोर्विवस्वत्या महि चित्रमनीकम्।
विश्वे जानन्ति महिना यदागादिन्द्रस्य कर्म सुकृता पुरूणि॥
ऋग्वेद/3/57/6
या ते अग्ने पर्वतस्येव धारासश्चन्ती पीपयद्देव चित्रा।
तामस्मभ्यं प्रमतिं जातवेदो वसो रास्व सुमतिं विश्वजन्याम्॥
ऋग्वेद/3/59/6
मित्रस्य चर्षणीधृतोऽवो देवस्य सानसि। द्युम्नं
चित्रश्रवस्तमम्॥
ऋग्वेद/3/61/6
ऋतावरी दिवो अर्कैरबोध्या रेवती रोदसी चित्रमस्थात्।
आयतीमग्न उषसं विभातीं वाममेषि द्रविणं भिक्षमाणः॥
ऋग्वेद/4/1/6
अस्य श्रेष्ठा सुभगस्य संदृग्देवस्य चित्रतमा मर्त्येषु।
शुचि घृतं न तप्तमघ्न्यायाः स्पार्हा देवस्य मंहनेव धेनोः ॥६॥
ऋग्वेद/4/7/1
अयमिह प्रथमो धायि धातृभिर्होता यजिष्ठो अध्वरेष्वीड्यः।
यमप्नवानो भृगवो विरुरुचुर्वनेषु चित्रं विभ्वं विशेविशे ॥१॥
ऋग्वेद/4/7/6
तं शश्वतीषु मातृषु वन आ वीतमश्रितम्। चित्रं सन्तं गुहा
हितं सुवेदं कूचिदर्थिनम् ॥६॥
ऋग्वेद/4/14/3
आवहन्त्यरुणीर्ज्योतिषागान्मही चित्रा रश्मिभिश्चेकिताना।
प्रबोधयन्ती सुविताय देव्यु१षा ईयते सुयुजा रथेन ॥३॥
ऋग्वेद/4/22/10
अस्माकमित्सु शृणुहि त्वमिन्द्रास्मभ्यं चित्राँ उप माहि
वाजान्। अस्मभ्यं विश्वा इषणः पुरन्धीरस्माकं सु मघवन्बोधि गोदाः ॥१०॥
ऋग्वेद/4/23/2
को अस्य वीरः सधमादमाप समानंश सुमतिभिः को अस्य। कदस्य
चित्रं चिकिते कदूती वृधे भुवच्छशमानस्य यज्योः ॥२॥
ऋग्वेद/4/23/6
किमादमत्रं सख्यं सखिभ्यः कदा नु ते भ्रात्रं प्र ब्रवाम।
श्रिये सुदृशो वपुरस्य सर्गाः स्व१र्ण चित्रतममिष आ गोः ॥६॥
ऋग्वेद/4/30/18
उत त्या सद्य आर्या सरयोरिन्द्र पारतः। अर्णाचित्ररथावधीः
॥१८॥
ऋग्वेद/4/31/1
कया नश्चित्र आ भुवदूती सदावृधः सखा। कया शचिष्ठया वृता ॥१॥
ऋग्वेद/4/32/2
भृमिश्चिद्घासि तूतुजिरा चित्र चित्रिणीष्वा। चित्रं
कृणोष्यूतये ॥२॥
ऋग्वेद/4/32/5
स नश्चित्राभिरद्रिवोऽनवद्याभिरूतिभिः। अनाधृष्टाभिरा गहि
॥५॥
ऋग्वेद/4/36/9
इह प्रजामिह रयिं रराणा इह श्रवो वीरवत्तक्षता नः। येन वयं
चितयेमात्यन्यान्तं वाजं चित्रमृभवो ददा नः ॥९॥
ऋग्वेद/4/51/2
अस्थुरु चित्रा उषसः पुरस्तान्मिताइव स्वरवोऽध्वरेषु। व्यू
व्रजस्य तमसो द्वारोच्छन्तीरव्रञ्छुचयः पावकाः ॥२॥
ऋग्वेद/4/51/3
उच्छन्तीरद्य चितयन्त भोजान्राधोदेयायोषसो मघोनीः। अचित्रे
अन्तः पणयः ससन्त्वबुध्यमानास्तमसो विमध्ये ॥३॥
ऋग्वेद/4/52/2
अश्वेव चित्रारुषी माता गवामृतावरी। सखाभूदश्विनोरुषाः ॥२॥
ऋग्वेद/5/3/3
तव श्रिये मरुतो मर्जयन्त रुद्र यत्ते जनिम चारु चित्रम्।
पदं यद्विष्णोरुपमं निधायि तेन पासि गुह्यं नाम गोनाम् ॥३॥
ऋग्वेद/5/5/3
ईळितो अग्न आ वहेन्द्रं चित्रमिह प्रियम्। सुखै रथेभिरूतये
॥३॥
ऋग्वेद/5/13/6
अग्ने नेमिरराँ इव देवाँस्त्वं परिभूरसि। आ
राधश्चित्रमृञ्जसे ॥६॥
ऋग्वेद/5/17/2
अस्य हि स्वयशस्तर आसा विधर्मन्मन्यसे। तं नाकं चित्रशोचिषं
मन्द्रं परो मनीषया ॥२॥
ऋग्वेद/5/18/4
चित्रा वा येषु दीधितिरासन्नुक्था पान्ति ये। स्तीर्णं
बर्हिः स्वर्णरे श्रवांसि दधिरे परि ॥४॥
ऋग्वेद/5/26/2
तं त्वा घृतस्नवीमहे चित्रभानो स्वर्दृशम्। देवाँ आ वीतये
वह ॥२॥
ऋग्वेद/5/31/6
प्र ते पूर्वाणि करणानि वोचं प्र नूतना मघवन्या चकर्थ।
शक्तीवो यद्विभरा रोदसी उभे जयन्नपो मनवे दानुचित्राः ॥६॥
ऋग्वेद/5/39/1
यदिन्द्र चित्र मेहनास्ति त्वादातमद्रिवः। राधस्तन्नो
विदद्वस उभयाहस्त्या भर ॥१॥
ऋग्वेद/5/40/3
वृषा त्वा वृषणं हुवे वज्रिञ्चित्राभिरूतिभिः। वृषन्निन्द्र
वृषभिर्वृत्रहन्तम ॥३॥
ऋग्वेद/5/52/11
अधा नरो न्योहतेऽधा नियुत ओहते। अधा पारावता इति चित्रा
रूपाणि दर्श्या ॥११॥
ऋग्वेद/5/59/8
मिमातु द्यौरदितिर्वीतये नः सं दानुचित्रा उषसो यतन्ताम्।
आचुच्यवुर्दिव्यं कोशमेत ऋषे रुद्रस्य मरुतो गृणानाः ॥८॥
ऋग्वेद/5/63/3
सम्राजा उग्रा वृषभा दिवस्पती पृथिव्या मित्रावरुणा
विचर्षणी। चित्रेभिरभ्रैरुप तिष्ठथो रवं द्यां वर्षयथो असुरस्य मायया ॥३॥
ऋग्वेद/5/63/4
माया वां मित्रावरुणा दिवि श्रिता सूर्यो ज्योतिश्चरति
चित्रमायुधम्। तमभ्रेण वृष्ट्या गूहथो दिवि पर्जन्य द्रप्सा मधुमन्त ईरते ॥४॥
ऋग्वेद/5/63/5
रथं युञ्जते मरुतः शुभे सुखं शूरो न मित्रावरुणा गविष्टिषु।
रजांसि चित्रा वि चरन्ति तन्यवो दिवः सम्राजा पयसा न उक्षतम् ॥५॥
ऋग्वेद/5/63/6
वाचं सु मित्रावरुणाविरावतीं पर्जन्यश्चित्रां वदति
त्विषीमतीम्। अभ्रा वसत मरुतः सु मायया द्यां वर्षयतमरुणामरेपसम् ॥६॥
ऋग्वेद/5/63/7
धर्मणा मित्रावरुणा विपश्चिता व्रता रक्षेथे असुरस्य मायया।
ऋतेन विश्वं भुवनं वि राजथः सूर्यमा धत्थो दिवि चित्र्यं रथम् ॥७॥
ऋग्वेद/5/82/3
स हि रत्नानि दाशुषे सुवाति सविता भगः। तं भागं चित्रमीमहे
॥३॥
ऋग्वेद/6/3/5
स इदस्तेव प्रति धादसिष्यञ्छिशीत तेजोऽयसो न धाराम्।
चित्रध्रजतिररतिर्यो अक्तोर्वेर्न द्रुषद्वा रघुपत्मजंहाः ॥५॥
ऋग्वेद/6/4/6
आ सूर्यो न भानुमद्भिरर्कैरग्ने ततन्थ रोदसी वि भासा।
चित्रो नयत्परि तमांस्यक्तः शोचिषा पत्मन्नौशिजो न दीयन् ॥६॥
ऋग्वेद/6/6/7
स चित्र चित्रं चितयन्तमस्मे चित्रक्षत्र चित्रतमं वयोधाम्।
चन्द्रं रयिं पुरुवीरं बृहन्तं चन्द्र चन्द्राभिर्गृणते युवस्व ॥७॥
ऋग्वेद/6/10/3
पीपाय स श्रवसा मर्त्येषु यो अग्नये ददाश विप्र उक्थैः।
चित्राभिस्तमूतिभिश्चित्रशोचिर्व्रजस्य साता गोमतो दधाति ॥३॥
ऋग्वेद/6/10/5
नू नश्चित्रं पुरुवाजाभिरूती अग्ने रयिं मघवद्भ्यश्च धेहि।
ये राधसा श्रवसा चात्यन्यान्त्सुवीर्येभिश्चाभि सन्ति जनान् ॥५॥
ऋग्वेद/6/17/2
स ईं पाहि य ऋजीषी तरुत्रो यः शिप्रवान्वृषभो यो मतीनाम्।
यो गोत्रभिद्वज्रभृद्यो हरिष्ठाः स इन्द्र चित्राँ अभि तृन्धि वाजान् ॥२॥
ऋग्वेद/6/26/5
त्वं तदुक्थमिन्द्र बर्हणा कः प्र यच्छता सहस्रा शूर दर्षि।
अव गिरेर्दासं शम्बरं हन्प्रावो दिवोदासं चित्राभिरूती ॥५॥
ऋग्वेद/6/38/1
अपादित उदु नश्चित्रतमो महीं भर्षद्द्युमतीमिन्द्रहूतिम्।
पन्यसीं धीतिं दैव्यस्य यामञ्जनस्य रातिं वनते सुदानुः ॥१॥
ऋग्वेद/6/46/2
स त्वं नश्चित्र वज्रहस्त धृष्णुया महः स्तवानो अद्रिवः।
गामश्वं रथ्यमिन्द्र सं किर सत्रा वाजं न जिग्युषे ॥२॥
ऋग्वेद/6/46/5
इन्द्र ज्येष्ठं न आ भरँ ओजिष्ठं पपुरि श्रवः। येनेमे चित्र
वज्रहस्त रोदसी ओभे सुशिप्र प्राः ॥५॥
ऋग्वेद/6/47/5
अयं विदच्चित्रदृशीकमर्णः शुक्रसद्मनामुषसामनीके। अयं
महान्महता स्कम्भनेनोद्द्यामस्तभ्नाद्वृषभो मरुत्वान् ॥५॥
ऋग्वेद/6/48/9
त्वं नश्चित्र ऊत्या वसो राधांसि चोदय। अस्य रायस्त्वमग्ने
रथीरसि विदा गाधं तुचे तु नः ॥९॥
ऋग्वेद/6/49/7
पावीरवी कन्या चित्रायुः सरस्वती वीरपत्नी धियं धात्।
ग्नाभिरच्छिद्रं शरणं सजोषा दुराधर्षं गृणते शर्म यंसत् ॥७॥
ऋग्वेद/6/49/11
आ युवानः कवयो यज्ञियासो मरुतो गन्त गृणतो वरस्याम्।
अचित्रं चिद्धि जिन्वथा वृधन्त इत्था नक्षन्तो नरो अङ्गिरस्वत् ॥११॥
ऋग्वेद/6/60/2
ता योधिष्टमभि गा इन्द्र नूनमपः स्वरुषसो अग्न ऊळ्हाः। दिशः
स्वरुषस इन्द्र चित्रा अपो गा अग्ने युवसे नियुत्वान् ॥२॥
ऋग्वेद/6/62/5
ता वल्गू दस्रा पुरुशाकतमा प्रत्ना नव्यसा वचसा विवासे। या
शंसते स्तुवते शंभविष्ठा बभूवतुर्गृणते चित्रराती ॥५॥
ऋग्वेद/6/62/11
आ परमाभिरुत मध्यमाभिर्नियुद्भिर्यातमवमाभिरर्वाक्।
दृळ्हस्य चिद्गोमतो वि व्रजस्य दुरो वर्तं गृणते चित्रराती ॥११॥
ऋग्वेद/6/65/2
वि तद्ययुररुणयुग्भिरश्वैश्चित्रं भान्त्युषसश्चन्द्ररथाः।
अग्रं यज्ञस्य बृहतो नयन्तीर्वि ता बाधन्ते तम ऊर्म्यायाः ॥२॥
ऋग्वेद/6/66/9
प्र चित्रमर्कं गृणते तुराय मारुताय स्वतवसे भरध्वम्। ये
सहांसि सहसा सहन्ते रेजते अग्ने पृथिवी मखेभ्यः ॥९॥
ऋग्वेद/6/72/4
इन्द्रासोमा पक्वमामास्वन्तर्नि गवामिद्दधथुर्वक्षणासु।
जगृभथुरनपिनद्धमासु रुशच्चित्रासु जगतीष्वन्तः ॥४॥
ऋग्वेद/6/75/9
स्वादुषंसदः पितरो वयोधाः कृच्छ्रेश्रितः शक्तीवन्तो
गभीराः। चित्रसेना इषुबला अमृध्राः सतोवीरा उरवो व्रातसाहाः ॥९॥
ऋग्वेद/7/3/6
सुसंदृक्ते स्वनीक प्रतीकं वि यद्रुक्मो न रोचस उपाके। दिवो
न ते तन्यतुरेति शुष्मश्चित्रो न सूरः प्रति चक्षि भानुम् ॥६॥
ऋग्वेद/7/9/3
अमूरः कविरदितिर्विवस्वान्त्सुसंसन्मित्रो अतिथिः शिवो नः।
चित्रभानुरुषसां भात्यग्रेऽपां गर्भः प्रस्व१ आ विवेश ॥३॥
ऋग्वेद/7/12/1
अगन्म महा नमसा यविष्ठं यो दीदाय समिद्धः स्वे दुरोणे।
चित्रभानुं रोदसी अन्तरुर्वी स्वाहुतं विश्वतः प्रत्यञ्चम् ॥१॥
ऋग्वेद/7/20/7
यदिन्द्र पूर्वो अपराय शिक्षन्नयज्ज्यायान्कनीयसो देष्णम्।
अमृत इत्पर्यासीत दूरमा चित्र चित्र्यं भरा रयिं नः ॥७॥
ऋग्वेद/7/45/4
इमा गिरः सवितारं सुजिह्वं पूर्णगभस्तिमीळते सुपाणिम्।
चित्रं वयो बृहदस्मे दधातु यूयं पात स्वस्तिभिः सदा नः ॥४॥
ऋग्वेद/7/61/5
अमूरा विश्वा वृषणाविमा वां न यासु चित्रं ददृशे न यक्षम् ।
द्रुह: सचन्ते अनृता जनानां न वां निण्यान्यचिते अभूवन् ॥
ऋग्वेद/7/68/5
चित्रं ह यद्वां भोजनं न्वस्ति न्यत्रये महिष्वन्तं युयोतम्
। यो वामोमानं दधते प्रियः सन् ॥
ऋग्वेद/7/74/2
युवं चित्रं ददथुर्भोजनं नरा चोदेथां सूनृतावते ।
अर्वाग्रथं समनसा नि यच्छतं पिबतं सोम्यं मधु ॥
ऋग्वेद/7/75/2
महे नो अद्य सुविताय बोध्युषो महे सौभगाय प्र यन्धि ।
चित्रं रयिं यशसं धेह्यस्मे देवि मर्तेषु मानुषि श्रवस्युम् ॥
ऋग्वेद/7/75/3
एते त्ये भानवो दर्शतायाश्चित्रा उषसो अमृतास आगु: ।
जनयन्तो दैव्यानि व्रतान्यापृणन्तो अन्तरिक्षा व्यस्थुः ॥
ऋग्वेद/7/75/5
वाजिनीवती सूर्यस्य योषा चित्रामघा राय ईशे वसूनाम् ।
ऋषिष्टुता जरयन्ती मघोन्युषा उच्छति वह्निभिर्गृणाना ॥
ऋग्वेद/7/75/6
प्रति द्युतानामरुषासो अश्वाश्चित्रा अदृश्रन्नुषसं वहन्तः
। याति शुभ्रा विश्वपिशा रथेन दधाति रत्नं विधते जनाय ॥
ऋग्वेद/7/77/3
देवानां चक्षु: सुभगा वहन्ती श्वेतं नयन्ती सुदृशीकमश्वम् ।
उषा अदर्शि रश्मिभिर्व्यक्ता चित्रामघा विश्वमनु प्रभूता ॥
ऋग्वेद/7/81/5
तच्चित्रं राध आ भरोषो यद्दीर्घश्रुत्तमम् । यत्ते दिवो
दुहितर्मर्तभोजनं तद्रास्व भुनजामहै ॥
ऋग्वेद/8/1/23
एन्द्र याहि मत्स्व चित्रेण देव राधसा । सरो न प्रास्युदरं
सपीतिभिरा सोमेभिरुरु स्फिरम् ॥
ऋग्वेद/8/3/2
भूयाम ते सुमतौ वाजिनो वयं मा न: स्तरभिमातये ।
अस्माञ्चित्राभिरवतादभिष्टिभिरा न: सुम्नेषु यामय ॥
ऋग्वेद/8/7/7
उदु त्ये अरुणप्सवश्चित्रा यामेभिरीरते । वाश्रा अधि ष्णुना
दिवः ॥
ऋग्वेद/8/7/33
ओ षु वृष्ण: प्रयज्यूना नव्यसे सुविताय । ववृत्यां
चित्रवाजान् ॥
ऋग्वेद/8/11/9
समत्स्वग्निमवसे वाजयन्तो हवामहे । वाजेषु चित्रराधसम् ॥
ऋग्वेद/8/13/5
नूनं तदिन्द्र दद्धि नो यत्त्वा सुन्वन्त ईमहे । रयिं
नश्चित्रमा भरा स्वर्विदम् ॥
ऋग्वेद/8/13/33
वृषा त्वा वृषणं हुवे वज्रिञ्चित्राभिरूतिभि: । वावन्थ हि
प्रतिष्टुतिं वृषा हव: ॥
ऋग्वेद/8/19/2
विभूतरातिं विप्र चित्रशोचिषमग्निमीळिष्व यन्तुरम् । अस्य
मेधस्य सोम्यस्य सोभरे प्रेमध्वराय पूर्व्यम् ॥
ऋग्वेद/8/21/1
वयमु त्वामपूर्व्य स्थूरं न कच्चिद्भरन्तोऽवस्यव: । वाजे
चित्रं हवामहे ॥
ऋग्वेद/8/21/17
इन्द्रो वा घेदियन्मघं सरस्वती वा सुभगा ददिर्वसु । त्वं वा
चित्र दाशुषे ॥
ऋग्वेद/8/21/18
चित्र इद्राजा राजका इदन्यके यके सरस्वतीमनु । पर्जन्य इव
ततनद्धि वृष्ट्या सहस्रमयुता ददत् ॥
ऋग्वेद/8/24/3
स न: स्तवान आ भर रयिं चित्रश्रवस्तमम् । निरेके चिद्यो
हरिवो वसुर्ददिः ॥
ऋग्वेद/8/39/5
स चिकेत सहीयसाग्निश्चित्रेण कर्मणा । स होता शश्वतीनां
दक्षिणाभिरभीवृत इनोति च प्रतीव्यं१ नभन्तामन्यके समे ॥
ऋग्वेद/8/44/6
मन्द्रं होतारमृत्विजं चित्रभानुं विभावसुम् । अग्निमीळे स
उ श्रवत् ॥
ऋग्वेद/8/46/20
सनित: सुसनितरुग्र चित्र चेतिष्ठ सूनृत । प्रासहा सम्राट्
सहुरिं सहन्तं भुज्युं वाजेषु पूर्व्यम् ॥
ऋग्वेद/8/46/27
यो म इमं चिदु त्मनामन्दच्चित्रं दावने । अरट्वे अक्षे
नहुषे सुकृत्वनि सुकृत्तराय सुक्रतु: ॥
ऋग्वेद/8/58/3
ज्योतिष्मन्तं केतुमन्तं त्रिचक्रं सुखं रथं सुषदं
भूरिवारम् । चित्रामघा यस्य योगेऽधिजज्ञे तं वां हुवे अति रिक्तं पिबध्यै ॥
ऋग्वेद/8/66/8
वृकश्चिदस्य वारण उरामथिरा वयुनेषु भूषति । सेमं न: स्तोमं
जुजुषाण आ गहीन्द्र प्र चित्रया धिया ॥
ऋग्वेद/8/66/14
त्वं नो अस्या अमतेरुत क्षुधो३ऽभिशस्तेरव स्पृधि । त्वं न
ऊती तव चित्रया धिया शिक्षा शचिष्ठ गातुवित् ॥
ऋग्वेद/8/67/3
तेषां हि चित्रमुक्थ्यं१ वरूथमस्ति दाशुषे ।
आदित्यानामरंकृते ॥
ऋग्वेद/8/70/6
आ पप्राथ महिना वृष्ण्या वृषन्विश्वा शविष्ठ शवसा । अस्माँ
अव मघवन्गोमति व्रजे वज्रिञ्चित्राभिरूतिभि: ॥
ऋग्वेद/8/81/1
आ तू न इन्द्र क्षुमन्तं चित्रं ग्राभं सं गृभाय । महाहस्ती
दक्षिणेन ॥
ऋग्वेद/8/92/17
यस्ते चित्रश्रवस्तमो य इन्द्र वृत्रहन्तमः । य ओजोदातमो
मद: ॥
ऋग्वेद/8/97/15
तन्म ऋतमिन्द्र शूर चित्र पात्वपो न वज्रिन्दुरिताति पर्षि
भूरि । कदा न इन्द्र राय आ दशस्येर्विश्वप्स्न्यस्य स्पृहयाय्यस्य राजन् ॥
ऋग्वेद/8/101/13
इयं या नीच्यर्किणी रूपा रोहिण्या कृता । चित्रेव
प्रत्यदर्श्यायत्य१न्तर्दशसु बाहुषु ॥
ऋग्वेद/9/4/10
रयिं नश्चित्रमश्विनमिन्दो विश्वायुमा भर । अथा नो
वस्यसस्कृधि ॥
ऋग्वेद/9/19/1
यत्सोम चित्रमुक्थ्यं दिव्यं पार्थिवं वसु । तन्न: पुनान आ
भर ॥
ऋग्वेद/9/61/16
पवमानो अजीजनद्दिवश्चित्रं न तन्यतुम् । ज्योतिर्वैश्वानरं
बृहत् ॥
ऋग्वेद/9/62/25
पवस्व वाचो अग्रियः सोम चित्राभिरूतिभि: । अभि विश्वानि
काव्या ॥
ऋग्वेद/9/68/10
एवा न: सोम परिषिच्यमानो वयो दधच्चित्रतमं पवस्व । अद्वेषे
द्यावापृथिवी हुवेम देवा धत्त रयिमस्मे सुवीरम् ॥
ऋग्वेद/9/86/34
पवमान मह्यर्णो वि धावसि सूरो न चित्रो अव्ययानि पव्यया ।
गभस्तिपूतो नृभिरद्रिभिः सुतो महे वाजाय धन्याय धन्वसि ॥
ऋग्वेद/9/100/8
पवमान महि श्रवश्चित्रेभिर्यासि रश्मिभि: । शर्धन्तमांसि
जिघ्नसे विश्वानि दाशुषो गृहे ॥
ऋग्वेद/10/1/2
स जातो गर्भो असि रोदस्योरग्ने चारुर्विभृत ओषधीषु । चित्रः
शिशु: परि तमांस्यक्तून्प्र मातृभ्यो अधि कनिक्रदद्गाः ॥
ऋग्वेद/10/1/5
होतारं चित्ररथमध्वरस्य यज्ञस्ययज्ञस्य केतुं रुशन्तम् ।
प्रत्यर्धिं देवस्यदेवस्य मह्ना श्रिया त्व१ग्निमतिथिं जनानाम् ॥
ऋग्वेद/10/2/6
विश्वेषां ह्यध्वराणामनीकं चित्रं केतुं जनिता त्वा जजान ।
स आ यजस्व नृवतीरनु क्षा स्पार्हा इष: क्षुमतीर्विश्वजन्याः ॥
ऋग्वेद/10/21/4
यमग्ने मन्यसे रयिं सहसावन्नमर्त्य । तमा नो वाजसातये वि वो
मदे यज्ञेषु चित्रमा भरा विवक्षसे ॥
ऋग्वेद/10/36/13
ये सवितुः सत्यसवस्य विश्वे मित्रस्य व्रते वरुणस्य देवाः ।
ते सौभगं वीरवद्गोमदप्नो दधातन द्रविणं चित्रमस्मे ॥
ऋग्वेद/10/37/10
शं नो भव चक्षसा शं नो अह्ना शं भानुना शं हिमा शं घृणेन ।
यथा शमध्वञ्छमसद्दुरोणे तत्सूर्य द्रविणं धेहि चित्रम् ॥
ऋग्वेद/10/47/1
जगृभ्मा ते दक्षिणमिन्द्र हस्तं वसूयवो वसुपते वसूनाम् ।
विद्मा हि त्वा गोपतिं शूर गोनामस्मभ्यं चित्रं वृषणं रयिं दा: ॥
ऋग्वेद/10/47/2
स्वायुधं स्ववसं सुनीथं चतु:समुद्रं धरुणं रयीणाम् ।
चर्कृत्यं शंस्यं भूरिवारमस्मभ्यं चित्रं वृषणं रयिं दा: ॥
ऋग्वेद/10/47/3
सुब्रह्माणं देववन्तं बृहन्तमुरुं गभीरं पृथुबुध्नमिन्द्र ।
श्रुतऋषिमुग्रमभिमातिषाहमस्मभ्यं चित्रं वृषणं रयिं दा: ॥
ऋग्वेद/10/47/4
सनद्वाजं विप्रवीरं तरुत्रं धनस्पृतं शूशुवांसं सुदक्षम् ।
दस्युहनं पूर्भिदमिन्द्र सत्यमस्मभ्यं चित्रं वृषणं रयिं दा: ॥
ऋग्वेद/10/47/5
अश्वावन्तं रथिनं वीरवन्तं सहस्रिणं शतिनं वाजमिन्द्र ।
भद्रव्रातं विप्रवीरं स्वर्षामस्मभ्यं चित्रं वृषणं रयिं दा: ॥
ऋग्वेद/10/47/6
प्र सप्तगुमृतधीतिं सुमेधां बृहस्पतिं मतिरच्छा जिगाति । य
आङ्गिरसो नमसोपसद्योऽस्मभ्यं चित्रं वृषणं रयिं दा: ॥
ऋग्वेद/10/47/7
वनीवानो मम दूतास इन्द्रं स्तोमाश्चरन्ति सुमतीरियानाः ।
हृदिस्पृशो मनसा वच्यमाना अस्मभ्यं चित्रं वृषणं रयिं दा: ॥
ऋग्वेद/10/47/8
यत्त्वा यामि दद्धि तन्न इन्द्र बृहन्तं क्षयमसमं जनानाम् ।
अभि तद्द्यावापृथिवी गृणीतामस्मभ्यं चित्रं वृषणं रयिं दा: ॥
ऋग्वेद/10/51/3
ऐच्छाम त्वा बहुधा जातवेद: प्रविष्टमग्ने अप्स्वोषधीषु । तं
त्वा यमो अचिकेच्चित्रभानो दशान्तरुष्यादतिरोचमानम् ॥
ऋग्वेद/10/65/3
तेषां हि मह्ना महतामनर्वणां स्तोमाँ इयर्म्यृतज्ञा
ऋतावृधाम् । ये अप्सवमर्णवं चित्रराधसस्ते नो रासन्तां महये सुमित्र्याः ॥
ऋग्वेद/10/69/11
शश्वदग्निर्वध्र्यश्वस्य शत्रून्नृभिर्जिगाय सुतसोमवद्भिः ।
समनं चिददहश्चित्रभानोऽव व्राधन्तमभिनद्वृधश्चित् ॥
ऋग्वेद/10/75/7
ऋजीत्येनी रुशती महित्वा परि ज्रयांसि भरते रजांसि । अदब्धा
सिन्धुरपसामपस्तमाश्वा न चित्रा वपुषीव दर्शता ॥
ऋग्वेद/10/78/1
विप्रासो न मन्मभिः स्वाध्यो देवाव्यो३ न यज्ञैः स्वप्नसः ।
राजानो न चित्राः सुसंदृश: क्षितीनां न मर्या अरेपस: ॥
ऋग्वेद/10/91/5
तव श्रियो वर्ष्यस्येव विद्युतश्चित्राश्चिकित्र उषसां न
केतव: । यदोषधीरभिसृष्टो वनानि च परि स्वयं चिनुषे अन्नमास्ये ॥
ऋग्वेद/10/99/1
कं नश्चित्रमिषण्यसि चिकित्वान्पृथुग्मानं वाश्रं वावृधध्यै
। कत्तस्य दातु शवसो व्युष्टौ तक्षद्वज्रं वृत्रतुरमपिन्वत् ॥
ऋग्वेद/10/100/12
चित्रस्ते भानुः क्रतुप्रा अभिष्टिः सन्ति स्पृधो जरणिप्रा
अधृष्टाः । रजिष्ठया रज्या पश्व आ गोस्तूतूर्षति पर्यग्रं दुवस्युः ॥
ऋग्वेद/10/106/3
साकंयुजा शकुनस्येव पक्षा पश्वेव चित्रा यजुरा गमिष्टम् ।
अग्निरिव देवयोर्दीदिवांसा परिज्मानेव यजथः पुरुत्रा ॥
ऋग्वेद/10/106/9
बृहन्तेव गम्भरेषु प्रतिष्ठां पादेव गाधं तरते विदाथः ।
कर्णेव शासुरनु हि स्मराथोंऽशेव नो भजतं चित्रमप्न: ॥
ऋग्वेद/10/107/10
भोजायाश्वं सं मृजन्त्याशुं भोजायास्ते कन्या३ शुम्भमाना ।
भोजस्येदं पुष्करिणीव वेश्म परिष्कृतं देवमानेव चित्रम् ॥
ऋग्वेद/10/111/7
सचन्त यदुषस: सूर्येण चित्रामस्य केतवो रामविन्दन् । आ
यन्नक्षत्रं ददृशे दिवो न पुनर्यतो नकिरद्धा नु वेद ॥
ऋग्वेद/10/112/9
नि षु सीद गणपते गणेषु त्वामाहुर्विप्रतमं कवीनाम् । न ऋते
त्वत्क्रियते किं चनारे महामर्कं मघवञ्चित्रमर्च ॥
ऋग्वेद/10/115/1
चित्र इच्छिशोस्तरुणस्य वक्षथो न यो मातरावप्येति धातवे ।
अनूधा यदि जीजनदधा च नु ववक्ष सद्यो महि दूत्यं१ चरन् ॥
ऋग्वेद/10/122/1
वसुं न चित्रमहसं गृणीषे वामं शेवमतिथिमद्विषेण्यम् । स
रासते शुरुधो विश्वधायसोऽग्निर्होता गृहपतिः सुवीर्यम् ॥
ऋग्वेद/10/123/7
ऊर्ध्वो गन्धर्वो अधि नाके अस्थात्प्रत्यङ्चित्रा
बिभ्रदस्यायुधानि । वसानो अत्कं सुरभिं दृशे कं स्व१र्ण नाम जनत प्रियाणि ॥
ऋग्वेद/10/140/3
ऊर्जो नपाज्जातवेदः सुशस्तिभिर्मन्दस्व धीतिभिर्हितः । त्वे
इष: सं दधुर्भूरिवर्पसश्चित्रोतयो वामजाताः ॥
यजुर्वेद/3/15
अयमिह प्रथमो धायि धातृभिर्हाता यजिष्ठो अध्वरेष्वीड्यः ।
यमप्नवानो भृगवो विरुरुचुर्वनेषु चित्रँविभ्वँविशेविशे ॥
यजुर्वेद/3/18
इन्धानास्त्वा शतँ हिमा द्युमन्तँँ समिधीमहि । वयस्वन्तो
वयस्कृतँँ सहस्वन्तः सहस्कृतम् । अग्ने सपत्नदम्भनमदब्धासोऽअदाभ्यम् । चित्रावसो
स्वस्ति ते पारमशीय ॥
यजुर्वेद/7/42
चित्रन्देवानामुदगादनीकञ्चक्षुर्मित्रस्य वरुणस्याग्नेः ।
आप्रा द्यावापृथिवी अन्तरिक्षँ सूर्य ऽआत्मा जगतस्तस्थुषश्च स्वाहा ॥
यजुर्वेद/11/43
स जातो गर्भाऽअसि रोदस्योरग्ने चारुर्विभृतऽओषधीषु । चित्रः
शिशुः परि तमाँस्यक्तून्प्रमातृभ्योऽअधि कनिक्रदद्गाः ॥
यजुर्वेद/11/62
मित्रस्य चर्षणीधृतो वो देवस्य सानसि ।
द्युम्नञ्चित्रश्रवस्तमम् ॥
यजुर्वेद/12/108
ऊर्जा नपाज्जातवेदः सुशस्तिभिर्मन्दस्व धीतिभिर्हितः ।
त्वेऽइषः सन्दधुर्भूरिवर्पसश्चित्रोतयो वामजाताः ॥
यजुर्वेद/13/46
चित्रन्देवानामुदगादनीकञ्चक्षुर्मित्रस्य वरुणस्याग्नेः ।
आप्रा द्यावापृथिवी अन्तरिक्षँ सूर्य आत्मा जगतस्तस्थुषश्च ॥
यजुर्वेद/15/16
अयन्दक्षिणा विश्वकर्मा तस्य रथस्वनश्च रथेचित्रश्च
सेनानीग्रामण्या । मेनका च सहजन्या चाप्सरसौ यातुधाना हेती रक्षाँसि
प्रहेतिस्तेभ्यो नमो अस्तु ते नो वन्तु ते नो मृडयन्तु ते यन्द्विष्मो यश्च नो
द्वेष्टि तमेषाञ्जम्भे दध्मः ॥
यजुर्वेद/15/26
अयमिह प्रथमो धायि धातृभिर्हाता यजिष्ठो अध्वरेष्वीड्यः ।
यमप्नवानो भृगवो विरुरुचुर्वनेषु चित्रं विभ्वँविशेविशे ॥
यजुर्वेद/15/31
त्वाञ्चित्रश्रवस्तम हवन्ते विक्षु जन्तवः ।
शोचिष्केशम्पुरुप्रियाग्ने हव्याय वोढवे ॥
यजुर्वेद/17/74
तँ सवितुर्वरेण्यस्य चित्रामाहँवृणे सुमतिँविश्वजन्याम् ।
यामस्य कण्वोऽअदुहत्प्रपीनाँ सहस्रधाराम्पयसा महीङ्गाम् ॥
यजुर्वेद/17/80
शुक्रज्योतिश्च चित्रज्योतिश्च सत्यज्योतिश्च
ज्योतिष्माँश्च । शुक्रश्चऽऋतपाश्चात्यँहाः ॥
यजुर्वेद/20/87
इन्द्रायाहि चित्रभानो सुता इमे त्वायवः । अण्वीभिस्तना
पूतासः ॥
यजुर्वेद/25/9
विधृतिन्नाभ्या धृतँ रसेनापो यूष्णा
मरीचीर्विप्रुड्भिर्नीहारमूष्मणा शीनँवसया
प्रुष्वाऽअश्रुभिह््र्रादुनीर्दूषीकाभिरस्ना रक्षाँसि चित्राण्यङ्गैर्नक्षत्राणि
रूपेण पृथिवीन्त्वचा जुम्बकाय स्वाहा ॥
यजुर्वेद/26/3
बृहस्पतेऽअति यदर्याऽअर्हाद्द्युमद्विभाति क्रतुमज्जनेषु ।
यद्दीदयच्छवसऽऋतप्रजात तदस्मासु द्रविणन्धेहि चित्रम् । उपयामगृहीतोसि बृहस्पतये
त्वैष ते योनिर्बृहस्पतये त्वा ॥
यजुर्वेद/27/38
स त्वन्नश्चित्र वज्रहस्त धृष्णुया मह स्तवानोऽअद्रिवः ।
गामश्वँ रथ्यमिन्द्र सङ्किर सत्रा वाजन्न जिग्युषे ॥
यजुर्वेद/27/39
कया नश्चित्रऽआ भुवदूती सदावृधः सखा । कया शचिष्ठया वृता ॥
यजुर्वेद/29/46
स्वादुषँसदः पितरो वयोधाः कृच्छ्रेश्रितः शक्तीवन्तो गभीराः
। चित्रसेनाऽइषुबलाऽअमृध्राः सतोवीराऽउरवो व्रातसाहाः ॥
यजुर्वेद/30/4
विभक्तारँ हवामहे वसोश्चित्रस्य राधसः । सवितारन्नृचक्षसम्
॥
यजुर्वेद/33/6
अयमिह प्रथमो धायि धातृभिर्हाता यजिष्ठोऽअध्वरेष्वीड्यः ।
यमप्नवानो भृगवो विरुरुचुर्वनेषु चित्रँविभ्वँविशेविशे ॥
यजुर्वेद/33/33
दैव्यावध्वर्यूऽआगतँ रथेन सूर्यत्वचा । मध्वा यज्ञँ
समञ्जाथे । तम्प्रत्नथा । अयँवेनश्चित्रन्देवानाम्॥
यजुर्वेद/34/33
उषस्तच्चित्रमाभरास्मभ्यँवाजिनीवति । येन तोकञ्च तनयञ्च
धामहे ॥
यजुर्वेद/36/4
कया नश्चित्र आ भुवदूती सदावृधः सखा । कया शचिष्ठया वृता ॥
सामवेद/40
अग्ने विवस्वदुषसश्चित्रꣳ राधो अमर्त्य । आ दाशुषे जातवेदो वहा त्वमद्या देवाꣳ
उषर्बुधः ॥४०॥
सामवेद/41
त्वं नश्चित्र ऊत्या वसो राधाꣳसि चोदय । अस्य रायस्त्वमग्ने रथीरसि विदा गाधं तुचे तु नः
॥४१॥
सामवेद/64
चित्र इच्छिशोस्तरुणस्य वक्षथो न यो मातरावन्वेति धातवे ।
अनूधा यदजीजनदधा चिदा ववक्षत्सद्यो महि दूत्यां३चरन् ॥६४॥
सामवेद/135
इहेव शृण्व एषां कशा हस्तेषु यद्वदान् । नि यामं
चित्रमृञ्जते ॥१३५॥
सामवेद/167
आ तू न इन्द्र क्षुमन्तं चित्रं ग्राभꣳ
सं गृभाय । महाहस्ती दक्षिणेन ॥१६७॥
सामवेद/169
कया नश्चित्र आ भुवदूती सदावृधः सखा । कया शचिष्ठया वृता
॥१६९॥
सामवेद/317
जगृह्मा ते दक्षिणमिन्द्र हस्तं वसूयवो वसुपते वसूनाम् ।
विद्मा हि त्वा गोपतिꣳ शूर गोनामस्मभ्यं चित्रं वृषणꣳ रयिं दाः ॥३१७॥
सामवेद/345
यदिन्द्र चित्र म इह नास्ति त्वादातमद्रिवः । राधस्तन्नो
विदद्वस उभयाहस्त्या भर ॥३४५॥
सामवेद/408
वयमु त्वामपूर्व्य स्थूरं न कच्चिद्भरन्तोऽवस्यवः ।
वज्रिञ्चित्रꣳ हवामहे
॥४०८॥
सामवेद/449
भगो न चित्रो अग्निर्महोनां दधाति रत्नम् ॥४४९
सामवेद/484
पवमानो अजीजनद्दिवश्चित्रं न तन्यतुम् । ज्योतिर्वैश्वानरं
बृहत् ॥४८४॥
सामवेद/629
चित्रं देवानामुदगादनीकं चक्षुर्मित्रस्य वरुणस्याग्नेः ।
आप्रा द्यावापृथिवी अन्तरिक्षꣳ सूर्य आत्मा जगतस्तस्थुषश्च ॥६२९॥
सामवेद/682
कया नश्चित्र आ भुवदूती सदावृधः सखा । कया शचिष्ठया वृता
॥६८२॥
सामवेद/708
वयमु त्वामपूर्व्य स्थूरं न कच्चिद्भरन्तोऽवस्यवः ।
वज्रिञ्चित्रꣳ हवामहे
॥७०८॥
सामवेद/728
आ तू न इन्द्र क्षुमन्तं चित्रं ग्राभꣳ
सं गृभाय । महाहस्ती दक्षिणेन ॥७२८॥
सामवेद/754
युवं चित्रं ददथुर्भोजनं नरा चोदेथाꣳ
सूनृतावते । अर्वाग्रथꣳ समनसा नि यच्छतं पिबतꣳ सोम्यं मधु ॥७५४॥
सामवेद/775
पवस्व वाचो अग्रियः सोम चित्राभिरूतिभिः । अभि विश्वानि
काव्या ॥७७५॥
सामवेद/810
स त्वं नश्चित्र वज्रहस्त धृष्णुया मह स्तवानो अद्रिवः ।
गामश्वꣳ
रथ्यमिन्द्र सं किर सत्रा वाजं न जिग्युषे ॥८१०॥
सामवेद/863
आ पप्राथ महिना वृष्ण्या वृषन्विश्वा शविष्ठ शवसा । अस्माꣳ
अव मघवन्गोमति व्रजे वज्रिञ्चित्राभिरूतिभिः ॥८६३॥
सामवेद/889
पवमानो अजीजनद्दिवश्चित्रं न तन्यतुम् । ज्योतिर्वैश्वानरं
बृहत् ॥८८९॥
सामवेद/999
यत्सोम चित्रमुक्थ्यं दिव्यं पार्थिवं वसु । तन्नः पुनान आ
भर ॥९९९॥
सामवेद/1056
रयिं नश्चित्रमश्विनमिन्दो विश्वायुमा भर । अथा नो
वस्यसस्कृधि ॥१०५६॥
सामवेद/1146
इन्द्रा याहि चित्रभानो सुता इमे त्वायवः । अण्वीभिस्तना
पूतासः ॥११४६॥
सामवेद/1168
समत्स्वग्निमवसे वाजयन्तो हवामहे । वाजेषु चित्रराधसम्
॥११६८॥
सामवेद/1172
यदिन्द्र चित्र म इह नास्ति त्वादातमद्रिवः । राधस्तन्नो
विदद्वस उभयाहस्त्या भर ॥११७२॥
सामवेद/1304
अगन्म महा नमसा यविष्ठं यो दीदाय समिद्धः स्वे दुरोणे ।
चित्रभानुꣳ रोदसी
अन्तरुर्वी स्वाहुतं विश्वतः प्रत्यञ्चम् ॥१३०४॥
सामवेद/1422
भूयाम ते सुमतौ वाजिनो वयं मा न स्तरभिमातये । अस्मान्
चित्राभिरवतादभिष्टिभिरा नः सुम्नेषु यामय ॥१४२२॥
सामवेद/1498
विभक्तासि चित्रभानो सिन्धोरूर्मा उपाक आ । सद्यो दाशुषे
क्षरसि ॥१४९८॥
सामवेद/1522
तं त्वा घृतस्नवीमहे चित्रभानो स्वर्दृशम् । देवाꣳ
आ वीतये वह ॥१५२२॥
सामवेद/1543
मन्द्रꣳ होतारमृत्विजं चित्रभानुं विभावसुम् । अग्निमीडे स उ श्रवत्
॥१५४३॥
सामवेद/1623
त्वं नश्चित्र ऊत्या वसो राधाꣳसि चोदय । अस्य रायस्त्वमग्ने रथीरसि विदा गाधं तुचे तु नः
॥१६२३॥
सामवेद/1688
विभूतरातिं विप्र चित्रशोचिषमग्निमीडिष्व यन्तुरम् । अस्य
मेधस्य सोम्यस्य सोभरे प्रेमध्वराय पूर्व्यम् ॥१६८८॥
सामवेद/1692
वृकश्चिदस्य वारण उरामथिरा वयुनेषु भूषति । सेमं न स्तोमं
जुजुषाण आ गहीन्द्र प्र चित्रया धिया ॥१६९२॥
सामवेद/1726
अश्वेव चित्रारुषी माता गवामृतावरी । सखा भूदश्विनोरुषाः
॥१७२६॥
सामवेद/1731
उषस्तच्चित्रमा भरास्मभ्यं वाजिनीवति । येन तोकं च तनयं च
धामहे ॥१७३१॥
सामवेद/1749
इदꣳ श्रेष्ठं ज्योतिषां ज्योतिरागाच्चित्रः प्रकेतो अजनिष्ट विभ्वा । यथा प्रसूता
सवितुः सवायैवा रात्र्युषसे योनिमारैक् ॥१७४९॥
सामवेद/1780
अग्ने विवस्वदुषसश्चित्रꣳ राधो अमर्त्य । आ दाशुषे जातवेदो वहा त्वमद्या देवाꣳ
उषर्बुधः ॥१७८०॥
सामवेद/1818
ऊर्जो नपाज्जातवेदः सुशस्तिभिर्मन्दस्व धीतिभिर्हितः । त्वे
इषः सं दधुर्भूरिवर्पसश्चित्रोतयो वामजाताः ॥१८१८॥
सामवेद/1847
ऊर्ध्वो गन्धर्वो अधि नाके अस्थात्प्रत्यङ्चित्रा
बिभ्रदस्यायुधानि । वसानो अत्कꣳ सुरभिं दृशे कꣳ स्वा३र्ण नाम जनत प्रियाणि ॥१८४७॥
अथर्ववेद/1/26/0/2
सखासावस्मभ्यमस्तु रातिः सखेन्द्रो भगः। सविता चित्रराधाः ॥
अथर्ववेद/4/25/0/3
तव व्रते नि विशन्ते जनासस्त्वय्युदिते प्रेरते चित्रभानो।
युवं वायो सविता च भुवनानि रक्षथस्तौ नो मुञ्चतमंहसः ॥
अथर्ववेद/7/15/0/1
तां सवितः सत्यसवां सुचित्रामाहं वृणे सुमतिं विश्ववाराम्।
यामस्य कण्वो अदुहत्प्रपीनां सहस्रधारां महिषो भगाय ॥
अथर्ववेद/8/10/5/6
तस्याश्चित्ररथः सौर्यवर्चसो वत्स आसीत्पुष्करपर्णं
पात्रम्।
अथर्ववेद/13/2/0/32
चित्रश्चिकित्वान्महिषः सुपर्ण आरोचयन्रोदसी अन्तरिक्षम्।
अहोरात्रे परि सूर्यं वसाने प्रास्य विश्वा तिरतो वीर्याणि ॥
अथर्ववेद/13/2/0/34
चित्रं देवानां केतुरनीकं ज्योतिष्मान्प्रदिशः सूर्य
उद्यन्। दिवाकरोऽति द्युम्नैस्तमांसि विश्वातारीद्दुरितानि शुक्रः ॥
अथर्ववेद/13/2/0/35
चित्रं देवानामुदगादनीकं चक्षुर्मित्रस्य वरुणस्याग्नेः।
आप्राद्द्यावापृथिवी अन्तरिक्षं सूर्य आत्मा जगतस्तस्थुषश्च ॥
अथर्ववेद/13/2/0/42
आरोहन्छुक्रो बृहतीरतन्द्रो द्वे रूपे कृणुते रोचमानः।
चित्रश्चिकित्वान्महिषो वातमाया यावतो लोकानभि यद्विभाति ॥
अथर्ववेद/13/3/0/10
यत्ते चन्द्रं कश्यप रोचनावद्यत्संहितं पुष्कलं चित्रभानु।
यस्मिन्त्सूर्या आर्पिताः सप्त साकम्। तस्य देवस्य क्रुद्धस्यैतदागो य एवं
विद्वांसं ब्राह्मणं जिनाति। उद्वेपय रोहित प्र क्षिणीहि ब्रह्मज्यस्य प्रति मुञ्च
पाशान् ॥
अथर्ववेद/19/7/0/1
चित्राणि साकं दिवि रोचनानि सरीसृपाणि भुवने जवानि।
तुर्मिशं सुमतिमिच्छमानो अहानि गीर्भिः सपर्यामि नाकम् ॥
अथर्ववेद/19/7/0/3
पुण्यं पूर्वा फल्गुन्यौ चात्र हस्तश्चित्रा शिवा स्वाति
सुखो मे अस्तु। राधे विशाखे सुहवानुराधा ज्येष्ठा सुनक्षत्रमरिष्ट मूलम् ॥
अथर्ववेद/19/13/0/1
इन्द्रस्य बाहू स्थविरौ वृषाणौ चित्रा इमा वृषभौ पारयिष्णू।
तौ योक्षे प्रथमो योग आगते याभ्यां जितमसुराणां स्वर्यत् ॥
अथर्ववेद/20/14/0/1
वयमु त्वामपूर्व्य स्थूरं न कच्चिद्भरन्तोऽवस्यवः। वाजे
चित्रं हवामहे ॥
अथर्ववेद/20/62/0/1
वयमु त्वामपूर्व्य स्थूरं न कच्चिद्भरन्तोऽवस्यवः। वाजे
चित्रं हवामहे ॥
अथर्ववेद/20/67/0/2
मो षु वो अस्मदभि तानि पौंस्या सना भूवन्द्युम्नानि मोत
जारिषुरस्मत्पुरोत जारिषुः। यद्वश्चित्रं युगेयुगे नव्यं घोषादमर्त्यम्। अस्मासु
तन्मरुतो यच्च दुष्टरं दिधृता यच्च दुष्टरम् ॥
अथर्ववेद/20/71/0/11
सं चोदय चित्रमर्वाग्राध इन्द्र वरेण्यम्। असदित्ते विभु
प्रभु ॥
अथर्ववेद/20/80/0/1
इन्द्र ज्येष्ठं न आ भरँ ओजिष्ठं पपुरि श्रवः। येनेमे चित्र
वज्रहस्त रोदसी ओभे सुशिप्र प्राः ॥
अथर्ववेद/20/81/0/2
आ पप्राथ महिना वृष्ण्या वृषन्विश्वा शविष्ठ शवसा। अस्माँ
अव मघवन्गोमति व्रजे वज्रिं चित्राभिरूतिभिः ॥
अथर्ववेद/20/84/0/1
इन्द्रा याहि चित्रभानो सुता इमे त्वायवः। अण्वीभिस्तना
पूतासः ॥
अथर्ववेद/20/92/0/21
आ पप्राथ महिना वृष्ण्या वृषन्विश्वा शविष्ठ शवसा। अस्माँ
अव मघवन्गोमति व्रजे वज्रिञ्चित्राभिरूतिभिः ॥
अथर्ववेद/20/97/0/2
वृकश्चिदस्य वारण उरामथिरा वयुनेषु भूषति। सेमं नः स्तोमं
जुजुषाण आ गहीन्द्र प्र चित्रया धिया ॥
अथर्ववेद/20/98/0/2
स त्वं नश्चित्र वज्रहस्त धृष्णुया मह स्तवानो अद्रिवः।
गामश्वं रथ्यमिन्द्र सं किर सत्रा वाजं न जिग्युषे ॥
अथर्ववेद/20/107/0/13
चित्रं देवानां केतुरनीकं ज्योतिष्मान्प्रदिशः सूर्य
उद्यन्। दिवाकरोऽति द्युम्नैस्तमांसि विश्वातारीद्दुरितानि शुक्रः ॥
अथर्ववेद/20/107/0/14
चित्रं देवानामुदगादनीकं चक्षुर्मित्रस्य वरुणस्याग्नेः।
आप्राद्द्यावापृथिवी अन्तरिक्षं सूर्य आत्मा जगतस्तस्थुषश्च ॥
अथर्ववेद/20/124/0/1
कया नश्चित्र आ भुवदूती सदावृधः सखा। कया शचिष्ठया वृता ॥
कोई टिप्पणी नहीं:
एक टिप्पणी भेजें