न मृता, म्रियते न मरिष्यति वा

 न मृता, म्रियते न मरिष्यति वा

सुरवागमृता सुखदा वरदा

द्विषतां नियतिं रचयिष्यति वा !! ध्रुवा ॥

 

निगमागमगीतिमयी रुचिरा.

रघुनाथकथामहिता मधुरा

पुनरद्य दशाननकर्मरतान्

घननादमुखान् निहनिष्यति वा ॥ १॥

 

नरपाल भगीरथ सङ्कलिता -

सुरसिन्धुरियं गगनाद्गलिता ।

विशदाश्रममव्यविनाश परान्

अभिशप्तजनान् गमयिष्यति वा ॥ २ ॥

 

इयमार्षतपोनिधि सञ्चयिनी

विपदां शमनी वसुधोज्जयिनी

इयमञ्चितसंस्कृति कीर्तिकथा

पुनरद्य भुवं मदयिष्यति वा ॥ ३ ॥

 

अमृतादधिकं परिपोषकरी

सुकृतादधिकं भवदोषहरी

पदबन्धरसामृत-चारुचयै-

श्चितिनीरसतां रसयिष्यति वा!

न मृता, म्रियते न मरिष्यति वा ! ! ॥ ४॥

 

लेखकः- डॉ. मिश्रोऽभिराजराजेन्द्रः